【急症室奇聞】長頸鹿醫生奇趣鹿(三)：醫生，我！要！投！訴！
怒氣沖沖但又有啲可愛嘅婆婆。
「醫生，我！要！投！訴！」
「咩事要投訴呀？」
「你開啲咩藥嚟㗎，咁難食嘅！」婆婆拎咗袋抗生素出嚟。
「冇法啦，咩藥都難食㗎啦~」
「唔係呢個問題呀！都唔知咩設計嚟嘅，啲藥粉咁難拎，點食啫，個膠囊鬼死咁硬，切又切唔到，用螺絲批開又冇咁細，好啦開到個殼，啲粉又難沖出嚟，人哋傷風㗎啦，咁啱一打個乞嚏連啲粉都唔見埋又要再搞過，你仲要開每四個鐘食一次，我搞都搞成個鐘轉個頭又要食過，冇陰公呀你~」
「……」㩒都㩒唔住。
(香港文化都係咁，成日以為人哋陰你，做人諗得簡單啲咪開心啲囉。)
原文節錄：《急症室奇趣鹿》 問問Dr Friend – 長頸鹿醫生
